Burda hava soyuyur,
yağış yağır arada.
mən gördüyün kimiyəm,
sən necəsən orada?

Saçlarımı kəsmişəm,
sığalın getsin deyə.
yəqin hazır deyildim
səni belə sevməyə.

Səhərlər yuxudan kal,
həvəssiz oyanıram.
əlimdə isti qəhvə
evi dörd dolanıram.

Qapıda miyoldayan
pişiyi oynadıram.
qazın üstə unudub,
dəm çayın qaynadıram.

Qarşımda pendir çörək,
çayım soyuyub qalır.
yaxşı ki İl Divo var,
bir az könlümü alır.

Tənha yalquzaq kimi
darıxmaqla məşqulam.
filmlərə baxıram
kitablar oxuyuram.

Mən dəryada yelkəni,
suya düşmüş gəmiyəm.
burda anaya həsrət,
yetim uşaq kimiyəm.