Daha səbr vaxtı deyil,
Can qurtaraq yaralardan,
Gəl göz yaşı axıtmayaq,
Gülək, gedək buralardan.

Bir kimsə görməsin bizi,
Gəl götürək sevgimizi,
Burda qoyub dərdimizi,
-Silək, gedək buralardan.

Gəl adlayaq hər çətini,
Yaşayaq eşq cənnətini,
Sevgimizin qiymətini,
-Bilək, gedək buralardan.

Ötürməyək bu payızı,
Orda qarşılayaq yazı,
Allahdan istəyək arzu,
-Dilək, gedək buralardan.

Qəlbimizdən vurulmamış,
Fələk bizə tor qurmamış,
Əzrayıl yolda durmamış,
Zirək gedək buralardan...