Müğənni Elnarə Xəlilova şəhər restoranlarının birində özünə təmtəraqlı ad günü mərasimi keçirib.

Qadınlar.biz-in məlumatına görə, saat 20:00-da başlayan gecədə sənətçinin yaxın dostları Natavan Həbibi, Samira da iştirak edib. Tədbiri həyat yoldaşı Rövşən Cahangirovla həzin musiqi sədaları altında rəqs edərək açan müğənni ad günü ilə bağlı hisslərini bölüşüb:

"Axırıncı dəfə 20 yaşımda özümə belə təmtəraqlı ad günü keçirtmişdim. Artıq üstündən 13 il keçib. Onda yanımda Röya və Natavan var idi. Natavan indi də yanımdadır. Özümə söz vermişəm ki, bütün gecəni rəqs edəcəyəm”.

Facebookda ona gələn təbriklərdən də söz açan Elnarə bir gecədə 241 mesaj aldığı üçün çox təəccübləndiyini söyləyib:

"Bu qədər dəyərli olduğumu bilmirdim. İnanın ki, həm sevənlərimdən, həm də mətbuatdan gördüyüm diqqət məni çox duyğulandırdı. İndi əminəm ki, mən doğrudan da kiməsə lazımam”.

Gecədə iştirak edən sənətçilər də öz növbələrində Elnarə Xəlilovanı təbrik edərək onun ünvanına xoş sözlər söyləyiblər. Bundan əlavə məşhurlar gecəyə qatılmaqdan məmnunluqlarını ifadə ediblər.

Müğənniyə alınan hədiyyələrə gəlincə, Natavan və Samira Elnarəyə sürpriz hazırlamadıqlarını, onu pulla təbrik edəcəklərini söyləyiblər.