Facebook-da virus kimi artan saxta profillər sosial şəbəkə istifadəçiləri üçün böyük problemə çevrilməyə başlayıb. Qarşısındakını gerçək profil zənn edən istifadəçilərin həm hesablarına virus düşür, həm də fırıldaqçılar tərəfindən aldadılmaq təhlükəsilə üz-üzə qalırlar.
Teleqraf.com xəbər verir ki, dünyanın tanınmış təhlükəsizlik şirkətlərindən biri olan Barracuda Networks Facebookda sürətlə yayılan saxta profillərlə bağlı önəmli açıqlama yayıb. Ümumilikdə 1,3 miyard sosial şəbəkə istifadəçisinin başına gələ biləcək təhlükə barədə xəbərdarlıq edən şirkət bu saxta profillərdən necə qorunmağın yolarını göstərib.
Məlumatda bildirilir ki, saxta profillərin əksəriyyəti qadın adı ilə qeydiyyatdan keçir. Bu, əlbəttə ki, kişiləri tələyə salmaq məqsədilə edilir.
Adətən, istifadəçilər cazibədar qadınların olduğu saxta profilləri düşünmədən dostluğa qəbul edirlər. Bu, saxta profilləri ələ verən əsas amillərdən biridir. Yəni cazibədar xanımların dostluğunda daha çox şəxs varsa, şübhələnməyə dəyər. Digər tərəfədən, saxta profillər şəkillərə tanımadığı insanları işarələməyi çox "sevir".