Çinin Honkonq şəhərində 31 yaşlı britaniyalı bankir Rurik Cattinqin məhkəmə prosesi başa çatıb. Cattinq iki indoneziyalı fahişəyə dəhşətli işgəncələr verəndən sonra onları qətlə yetirməkdə suçlanıb.

Milli.Az Daily Mail-ə istinadən bildirir ki, Cattinq 2014-cü ildə mənzilində həbs olunmuşdu. Britaniyadakı dünyaca məşhur Winchester College-də təhsil alandan sonra Kembric Universitetini bitirmiş Cattinq "Bank of America Merrill Lynch"də çalışırdı. Onun aylıq maaşı 60 min dollar idi.

R.Cattinq 2014-cü ilin oktyabrın 27-də Honkonqdakı gecə barlarından birində 23 yaşlı indoneziyalı fahişə Sumarti Niqsihlə tanış olur. Niqsihi mənzilinə aparan Cattinq 3 gün sərasər qadını döyür, zorlayır. İşgəncələri iPhone smartfonu ilə çəkən Cattinq qadının başını kəsib. 3 gün sonra, noyabrın 1-də isə o, indoneziyalı Senenq Mujiasihlə tanış olur, qadını mənzilinə aparır, orada dəhşətli işgəncələrdən sonra xüsusi amansızlıqla qətlə yetirir.

O, ikinci qadını öldürəndə ilk qurbanının şaqqalanmış cəsədi eyvanda, çamadanda idi.

Bu 6 gün ərzində o, bütün əməllərini iPhone-a çəkmişdi.

Daha sonra Honkonqdan qaçmaq, bir qədər keçəndən sonra isə intihar fikrinə düşən Rurik Cattinq seks-şopa, oradan da məişət texnikası dükanına yollanaraq yeni qurban axtarıb.

Məhkəmədə prokurorun dediyinə görə, Cattinq qurbanlarına işgəncə verdiyi günlərdə hər gün 10 qram kokain və 2 litr spirtli içki qəbul edirmiş.

Məhkəmədə R.Cattinq deyib: "Hətta ən ağır qətllər baxımından cinayətlərim dəhşətlidir. Məni ruhlar, xəyulələr daim narahat edir. Onlardan qurtula bilmirəm. Bağışlayın məni, əfv edin".

Honkonq məhkəməsinin hakimi Maykl-Stüart Murun hökmünə əsasən, R.Cattinq iki ömürlük həbs cəzası alıb.

Hökm oxunanda Rurik Cattinq soyuqqanlı idi. O, susurdu.