Ümumi təmizliyə görə ən azı həftədə bir dəfə hamamlanmaq məsləhətdir.
Hamama sol ayaqla girilir və sağ ayaqla çıxılır.
Hamama girmədən əvvəl hamamın təmiz olmasına diqqət edin.
Ətrafa çox su sıçramaması üçün mümkünsə bir oturacaq üzərinə oturub çimmək lazımdır.
Əgər təmizlənmək üçün istifadə edəcəyiniz su bir qabda (vedrədə) isə əlinizi onun içərisinə soxaraq istilik dərəcəsini yoxlamayın. Dolça ilə bir az götürüb kənarda əlinizə tökərək yoxlayın.
Hamamda ikən havalandırma sisteminin olmasına və ya havalanmanın aparılmasına diqqət edin.
Çimdikdən sonra hamamı təmiz və gözəl görünəcək şəkildə qoyub çıxmaq yaxşıdır. Çıxarkən hamamda paltar, sabun, şampun, üzqırxma aləti və s. qalmamasına çalışın.
Həftədə bir əl və ayaq dırnaqlarının təmizliyinə, 15 gündə bir isə qoltuq altı və digər yerlərin təmizliyinə çalışmaq lazımdır.
Normal hava şəraitində hər həftə alt paltarınızı dəyişməniz məsləhətdir. Çox tərləyənlər isə üç gündə bir dəyişdirsələr yaxşıdır. İsti günlərdə və çox fiziki işlə məşğul olanlarda bu artıb-azala bilər.
Daha yaxşı təmizlik üçün lif, kisə və s. hamam əşyalarından istifadə etmək lazımdır.
Hamamda danışmaq, oxumaq, bir şey yemək-içmək və s. ədəbə uyğun deyil.
Hamamdan çıxarkən paltarınızın nizamlı və düzgün olmasına diqqət edin.