Əsir xəfif payız mehi,
Rəqs eyləyir quru otlar.
Göydən yerə baxır Günəş,
Tamaşaya dönür diyar..

Bu sevincə şərik çıxan,
Yerə düşmüş qoz yarpağı.
Xışıldayıb həzin-həzin,
Qucaqlayır hey torpağı.

Əzizimsən deyə-deyə,
Dəli kimi öpür yeri.
Üstəlik də söyləyir ki,
Darıxmışdım yaydan bəri.

Nə yaxşı ki, gəldi payız,
Yorulmuşdum şən günlərdən.
Həyatımız qəribədir,
Səadət də yorur hərdən.

Fərəh dolu yaydan bezib,
Qəmli payız gəlsin dedim.
Geri gəlməz o anların,
Bilirəm ki, haqqın yedim.

Aynur HAQVERDİ