Alik Bakıda doğulub. Anası rus,
atası azərbaycanlıdır. Qardaşı doğulanda onun 4 yaşı olub. Anaları
Seymuru dünyaya gətirdiyi vaxt həyatını itirib. Xatırlayır ki, həmişə
qardaşını qorumaq məcburiyyətində qalıb. Qardaşı Seymur uşaqlıqdan
epilepsiya xəstəliyinə tuş gəldiyi üçün yanında həmişə kiminsə olması
lazım gəlirmiş. Ataları Sumqayıtda, zavodda işlədiyi üçün işi ağır
olurdu. Uşaqlar onu ancaq yatmazdan 1-2 saat əvvəl görə bilirdilər. Alik
yaşa dolduqca evdə atasını əvəz etməyə başlayırdı. İki uşaq, çətin
şəraitdə bütün günü işləyən ata oğullarına ögey ana əziyyəti vermək
istəmirdi. Alik dərsdən gələn kimi kiçik qardaşı Seymura yemək
hazırlardı. O özü də bilmədən kiçik qardaşının həm atasına, həm də
anasına çevrilmişdi. Öz dərslərindən əvvəl onun dərslərinə kömək edər,
atası gələnə qədər qardaşının nazı ilə oynardı. Məktəb, yaşadıqları
binadakı qonşular demək olar ki, valideynsiz böyüyən uşaqların
tərbiyəsinə, davranışına həsəd aparırdılar.
Alik məktəbi
bitirdiyi il sənədlərini Azərbaycan Neft Akademiyasına verir. Tələbə
həyatını da demək olar ki, ev qayğıları çəkməklə keçirir. Dərsdən sonra
iş tapıb qaravulçu işləyir. Qardaşının əyin-başını təmin edir. Atası isə
aldığı fəhlə maaşı ilə yalnız uşaqlarının qidasına pul çatdırır.
Alik universiteti bitirdiyi il qardaşı Seymur Azərbaycan
İqtisadiyyat Universitetinə daxil olur. Qardaşının özünün yaşamadığı
tələbə həyatını yaşaması üçün əlindən gələni edir.
Alik
imtahanla yaxşı işə qəbul olunur. Maaşı atasını sevindirir. Ancaq bu
müddətdə ürəyində gizli sevgisi olduğunu nə qardaşına, nə də atasına
açır. O, Seymurla paralel siniflərdə oxuyan Nərmin adlı çəlimsiz, gözləri yamyaşıl, hündür qamətli bir qıza aşiq olmuşdu.
Nərminlə qonşu binalarda yaşasalar da ürəklənib ona sirrini aça
bilmirdi.
Seymur artıq ikinci kursu bitirirdi. Dərsləri də yaxşı
gedirdi. Qardaşı onu işləməyə qoymurdu. Uşaqlığındakı kimi şıltaq
həyatına davam edirdi. Nadir hallarda da olsa onun epilepsiyası arada
tuturdu. Hər dəfə xəstəlik özünü büruzə verəndə Alik cəhənnəm əzabı
çəkirdi. Qardaşını itirməkdən çox qorxurdu.
Dərs ilinin sonu
idi. Seymur qardaşı ilə dənizdən qayıdırdı. Qardaşı Alikin kefinin yaxşı
olduğunu görüb ona ürəyini açdı. Seymur evlənmək istəyirdi. Alikə
əlində böyüyən qardaşının evlənmək istəyi həm gülməli, həm də qəribə
gəlirdi. Ancaq o qardaşına evləmək üçün kömək etməyə hazır idi. Seymur
Aliki əmin edirdi ki, sevdiyi qız çox yaxşıdır, anlayışlıdır. Onlardan
nə təmtəraqlı toy, nə də çoxlu qır-qızıl tələb edəcək. Beləliklə,
qardaşlar qərara aldılar ki, axşam ataları işdən gələndə Seymurun
evlənmək qərarını ona desinlər.
Atası
işdən gələn kimi Alik gülə-gülə Seymurun evlənmək istədiyini dedi.
Atası və Alik Seymurun qardaşının tələsik evlənmək istəyinə güldülər.
Atası isə Alikin böyük qardaş olduğunu, növbənin onda olduğunu deyirdi.
Alik atasına etiraz etdi ki, onun hələ evlənmək niyyəti yoxdur. Seymur
arxayınlıqla evlənə bilər.
Atasının maraqlandığı isə qızı hardan
tanıması, qızın ailəsininin kimliyi idi. Seymur nəhayət ki, evlənmək
istədiyi qızın adını, kimliyini deyir.
Qız Alikin uşaqlıqdan bəri
sevdiyi Nərmin idi! Dünya Alikin başına dolansa da, səsini çıxarda
bilmir. Atası onun vəziyyətinin pisləşdiyini anlayır. O isə deyir ki,
dənizdə onu gün vurub.
Alik səhərə qədər öz otağına çəkilib
ağlayır. Qardaşdan çox övladı kimi sevdiyi Seymur üçün o həm uşaqlığını,
həm də gəncliyini qurban vermişdi. Onun xoşbəxtliyi üçün hər şeyə hazır
idi. Həm də Seymur günahkar deyildi ki, o, sevgisini vaxtında qıza
etiraf etməyib. Həmin gecə Alik and içir ki, Nərmini ürəyindən
birdəfəlik çıxarsın. Axı, Nərmin onlara gəlin gələcəkdi. Ancaq qardaşı
üçün...
Söhbətdən iki ay sonra Alikin atası və əmisi musiqi
texnikumunda təhsil alan Nərmingilə elçi gedir. Ailələr bir-birlərini
bəyənir. İkinci elçilikdən sonra isə nişanın günü məlum olur.
Bu
dövrdə isə Alik Nərmini unutmaq üçün Şəbnəm adlı qrup yoldaşı ilə
görüşməyə başlayır. Bir müddətdən sonra öz-özünü aldatdığını anlayır.
Toy
günü Alik hamıdan çox sevinib şənlənir. Qardaşının toyunun bütün
xərcini özü çəkir. Amma özünü nə qədər məcbur edirsə, Nərminin üzünə
baxa bilmir.
Toy gecəsi gəlni evə gətirdikdən sonra Alik və atası
qohumların evinə gedir. Alik həddən çox içkili olduğu üçün həmin gecəni
xatırlamır. Toy gününün səhəri məlum olur ki, Nərmin bakirə deyil. Bu
sirri aşkarladıqdan sonra Seymur onu döyür. Alik və atası nə qərar
verəcəklərini bilmirdilər. Xəbərin kənara çıxmamağına çalışır, Seymuru
sakitləşdirirlər. Nərmin isə bakirəliyini hələ 15 yaşı olanda, qəza
nəticəsində itirdiyini iddia edir.
Seymur buna inanmır.
Evləndikləri ilk gündən aralarında hər gün mübahisə olur. Mübahisələri
getdikcə böyüyür. Alik iki sevdiyi insanın hər gün necə bir-birlərini
məhv etdiyinə göz yuma bilmir.
Evlilikdən 4 ay beləcə keçir.
Seymur bir müddət uzaqlaşmaq üçün heç kimə xəbər vermədən universiteti
atıb Rusiyaya gedir. Qardaşı və atası onu aylarla axtarmalı olur. Nərmin
isə bu müddətdə evdən çölə çıxmırdı. Bir gecə öz otağına çəkilib içki
içən Alik evdə hamının yatdığını görüb arxayınlıqla hamama girib vanna
qəbul etmək qərarına gəlir. Hamamın qapısını bağlamadan vannanı doldurub
suya uzanır. İçkinin və isti suyun təsirindən gözləri qapanır.
Gözlərini açanda isə Nərmini çılpaq vəziyyətdə özü ilə birgə vannada
görür.
İçkinin və Nərminə illərdən bəri hiss etdiyi ehtirasın təsirindən özünü qoruya bilmir...
Özünə
gələndə nə qədər böyük səhv elədiyini anlayır. Bunda isə ancaq Nərmini
günahlandırır. Onun içkili vəziyyətindən istifadə edib qardaşına xəyanət
etmişdi. Özünü bağışlaya bilmirdi.
Günah və xəyanət dolu gündən
heç bir həftə keçməmiş Seymur Rusiyadan evlərinə geri qayıdır. O
deyəsən, hər şeyi unutmuşdu. Rusiya həyatı Nərminin toy gecə bakirə
olmadığını, dava etdiyi günləri onun yadından çıxara bilmişdi.
Münasibətləri həmişəki qaydasına düşmüşdü. Aliksə qardaşına xəyanət
etdiyini düşünəndə intihar etmək istəyirdi.Özünü bağışlamamışdı.
Evdən
bir müddət uzaqlaşmaq üçün iş gəzintisi adı ilə kirayə ev tutub evdən
çıxır. Yalnız qardaşı zəng edib ata olacağı xəbərini verəndən sonra evə
qayıdır.
6 il beləcə keçir. Alikin həyatında saysız-hesabsız
qadınlar olur. Lakin o, heç kimlə ciddi münasibətlərə girmək istəmir;
nə özünü, nə də Nərmini bağışlamırdı. Nərminlə Seymurun artıq 5 yaşlı
Davud adlı oğulları var idi. Evdə olduğu müddətdə Alik Davuddan başqa
heç kimlə ünsiyyətə girmirdi. Ancaq qardaşı oğlu ilə oynayırdı. Nərmin
isə bu müddətdə musiqi texnikumunu bitirmişdi. İndi onun ətrafında çoxlu
müğənnilər var idi. Hər həftə onu harasa dəvət edirdilər. Alikin
qulağına çatmışdı ki, qardaşı arvadı özünü həmin məclislərdə evli kimi
aparmır, məclislərin birində tanış olduğu bir kişi ilə mütəmadi görüşür.
Bunun haqq hesabını çəkmək istəyirdi. Qardaşı arvadını evdə tək
tutub danışmaq istəyirdi. Yay gecəsi qardaşının, Davudun və atasının
dənizdən gec qayıtdığını görüb Nərmini söhbətə çəkdi. Bir neçə saat
mübahisədən sonra Alik əsəblərini sakitləşdirmək üçün əlini içkiyə atdı.
6
il əvvəl baş verənlər təkrarlandı: xəyanət yenidən yaşandı. Yayın
istisində, qaranlıq gecədə qəfildən xəyanətlə məşğul olduqları otaqda
işıqlar yandı. Gələn Seymur idi. Alik içkinin təsirindən çıxa bilmirdi.
Nə qədər çalışsa da, yataqdan qalxa bilmədi. O, yerindən addımalaya
qədər Seymur stolun üstündən götürdüyü bıçağı Nərminin sinəsinə sancdı.
Bir əli ilə də yaralı Nərminin boğazından yapışıb boğub öldürdü. Seymur
qardaşını da təpikləyib döyməyə başladı. O, yenə də ayılmırdı.
Az
keçməmiş binanın qarşısını polis maşınları aldı. Seymuru polislər,
Aliklə Nərmini isə həkimlər maşına qoyub apardı. Gözünü xəstəxanada
açanda Alik öyrəndi ki, Nərmin yerindəcə keçinib. Qardaşı isə istintaq
təcridxanasındadır.
Alik xəstəxanadan çıxandan sonra atası ürək
tutmasından dünyasını dəyişdi. Davuda o baxmalı oldu. Bircə dəfə də
olsun qardaşını görməyə həbsxanaya gedə bilmədi. Özünü günahkar hiss
edirdi. Bacarmırdı. Utanırdı. Ölməməyinə səbəb isə balaca Davud idi.
Nərminin
ailəsi təxminən 1 il sonra Alikə bir sirr açdı. Nərminlə Seymurun
arasında heç vaxt cinsi əlaqə olmamışdı. Uşaqlıqdan epilepsiyalı Seymur
həm də impotent imiş...
Davud Alikin doğma oğluymuş...Həyat Aliklə
çox pis davranmışdı. Səhvləri,zəhmətləri onu həyatdan bezdirmişdi. O həm
qardaşına, həm də sevdiyi qadına olan hisslərinin qurbanı idi.
P.S Əziz oxucu, heç vaxt sevgini gizlətmə. Sevgini gizlətməyin tək sənin yox, başqalarının da həyatının uçuruma düşməsi ola bilər.