Rusiyanın Şimali Osetiya-Alaniya Respublikasında 25 yaşlı qadın dünyaya gətirdiyi körpəsini satmaq istəyəndə həbs olunub.
Mozdok rayonunda yaşayan və fahişəliklə məşğul olan qadın 2 həftəlik uşağını "alıcı"lara verəndə tutulub. "Alıcı"lar polis əməkdaşları idilər.
Rusiya DİN-in mətbuat xidmətinin yetkilisi İrina Volkun dediyinə görə, Şimali Osetiya-Alaniyanın hüquq-mühafizə əməkdaşları ötən ay hamilə qadının doğacağı uşağı satmaq fikrində olması barədə operativ məlumat almışdılar.
Qadın övladını dünyaya gətirib və satışa çıxarıb. 4 kq çəkisi olan oğlan üçün ana pulu dərhal, nağd şəkildə tələb edib.
"Polis əməkdaşları özlərini uşaqsız ailə kimi təqdim ediblər. Qadın onlardan 150 min rubl alanda tutulub", - İ.Volk deyib.
Mozdok rayonunun sakini olan 25 yaşlı qadının 7 yaşlı qızı var. Uşaq kənddə nənəsi ilə yaşayır. Qadın isə Vladiqafqazda kirayədə yaşayır və fahişəliklə məşğul olurdu.
Satışa çıxarılmış uşaq indi Vladiqafqazdakı Respublika Uşaq Klinik Xəstəxanasındadır.