İstənilən yaşda dəbli görünmək olar. Yetər ki, bunun üçün istək və həvəs olsun. Müasir dəb yalnız cavan xanımlara deyil, eləcə də nənələrə dəblə ayaqlaşmağa icazə verir. Çünki onların arxasında böyük həyat təcrübəsi və bilik dayanır. Bu təcrübədə onlar keçici dəb cərəyanları ilə əbədi klassikanı bir-birindən fərqləndirməyi dərindən mənimsəyiblər. Dizaynerlər və dəb  tənqidçiləri də yaşlı xanımların bu cür geyim tərzini dəstəkləyirlər. Çünki onlar əmindirlər ki, illər keçdikcə zövqlər dəyişir.

Amerikalı blogger Ari Set Koen müəllifi olduğu "Advanced Style” bloqunda müxtəlif ölkələrdə 70-98 yaşlı əcnəbi xanımların fotolarını yerləşdirib. Şəkilləri çəkməsinin əsas səbəbi həmin xanımların əksəriyyətinin istənilən yaşda baxımlı görünməsidir. Məsələ ondadır ki,xanımların yaşı 70-i haqlasa da, hələ də səliqəli, gözəl və dəbli geyinməyi sevirlər. Bu üzdən onlara baxanda yaş amilini unudursan.

Blogger fotokolleksiyası ilə yaşlı xanımların başqa tərəfini göstərməyə çalışıb. O bildirib ki, insanlar istənilən yaşda yaxşı görünmək istəyirlər, bu qadınlar isə hamımız üçün ideal nümunədir.

Fikir vermisinizsə, şəhərimizin xanımlarının çoxu qara, qəhvəyi və ağ rəngin müxtəlif çalarlarına üstünlük verirlər. Bu yazının qəhrəmanları isə gənc qızlardan fərqli olaraq, əlvan və parlaq rənglər, diqqət çəkən naxışlar və dəbdəbəli bəzək əşyalarından qorxmurlar. Nəfis minimalizm ilə əbədi klassikanın vəhdəti sayəsində qeyri-adi obrazlar yaradırlar. Qısa desək, onların qarderobu darıxdırıcı deyil, hətta bizim həyatımızdan daha rəngarəngdir.

Bu xanımların çoxu bloggerə etiraf edib ki, əşyalarının əksəriyyəti illərdir ki, onlara yoldaşlıq edir, zinət əşyalarını göz bəbəkləri kimi qoruyurlar. "Hermes”, "Christian Dior”, "Chanel” kimi dünyaşöhrətli moda evlərindən aldığı geyimləri isə nəvələrinə miras saxlayırlar. Bu cür vintaj geyimlər indi aktual olduğu üçün müasir dəbsevərlərin də ürəyincədir.

Yaşlı nənələr həm də istənilən yaşda gözlərindəki parıltını saxlamaq qabiliyyətinə malikdirlər. Ümid edək ki, bizim də qocalığımız bu xanımlar kimi unudulmaz olacaq. Hesab edirik ki, müasir qızların baxıb öyrənməli olduğu çox şey var.