Kişilər görüşəndə adətən həmişə əl verib görüşürlər, qadınlarda isə bu vacib deyil.
Əl sıxma insan əlaqələrində güvən, sevgi və səmimiyyət biruzəsi olaraq bir növ salamlama metodudur. Amma rəsmiyyətdə ilk əl uzatma haqqı titul, rütbə və vəzifəcə yuxarı olana aiddir.
İctimai həyatda isə əl uzatma haqqı ev sahibinə, yaşca böyük olana, xanıma və sosial status baxımından yuxarı olana aiddir.
Əl sıxma zamanı nə qüvvət yoxlaması aparırmış kimi çox sıxmaq, nə də əlin ölü balıq kimi uzadılıb buraxılması doğru sayılır.
Doğru olan əlin qarşıdakı insanın əlini qavrayacaq şəkildə tutulması, əl sıxmanın canlı və daxildən olmasıdır. Əl sıxmada soyuq davranmaq, əli heç tərpətmədən quru-quru uzadıb əl tutuşmaq qarşıdakı tərəfindən yaxşı qarşılamaz, soyuqluq yaradar. Eyni zamanda əl sıxma uzun çəkməməli və qollar müqavilə bağlayanlar kimi yellənməməlidir.
Uzadılan əli qəbul etməmək böyük hörmətsizlikdir. Ayrıca əl sıxmamaq adamın özünə və qarşıdakına güvəni olmadığını göstərir.
İki-üç nəfər olan yerdə əl sıxmağa ən üstdən (böyükdən) başlanır. Kişilər görüşərkən ayağa qalxarlar, xanımlar qalxmaya bilər. Ancaq rəsmi yerdə və rəislərlə görüşərkən xanımlar da ayağa qalxmalıdır.
Üç və daha çox adam olan qrup ilə görüşərkən əl vermək vacib deyil.
Kişilər görüşərkən əlcəyi mütləq çıxarmalıdırlar. Qadınlar isə bunu etməyə bilərlər.
Kafedə, məclisdə – yemək əsnasında əl verib görüşmək vacib deyil. Yüngülcə başı tərpətmək və ya stuldan bir az qalxaraq təzim etmək kifayətdir.
Salamlaşma zamanı kişilərin diqqətli olmağı vacibdir. Ümumiyyətlə, cəmiyyətimizdə qadın əlini uzatmadıqca kişinin əl uzatmağı xoş qarşılanmaz.
Əl sıxmada (əl ilə görüşmələrdə), yuxarı vəzifədə olanların və yaşlıların öncə əl uzatmaları, bunu görən aşağı vəzifədə olan qadın və kişilərin əllərini uzadaraq görüşmələri ümumi davranış qaydalarındandır.
Böyük din adamları – seyyid, imam və s. əlindən öpmək gözəldir. Küçədə görüşərkən əl öpmək olmaz. Hörmət əlaməti kimi azacıq qabağa əyilib iki əlli görüşmək məsləhətdir.
Kiçik uşaqların yanağından öpmək olar. Böyüklərin öpüşməsi isə son illərdə məsləhət deyil.