Nadi Əli duası mötəbərdirmi?

“Nadi Əli” məşhur bir duanın adı və ilk sözləridir. Bu duanı müxtəlif çətinliklər zamanı oxumaq məsləhət görülüb. Çətin işlərin həlli, ruzinin artması, borcu qaytarmaq, övlad sahibi olmaq, insanların, cinlərin və heyvanların şərindən amanda qalmaq və s. məqsədlər üçün fərqli saylarda və şəkillərdə oxunur. Nadi Əli duası Əllamə Məclisinin “Zad əl-məad” adlı məşhur dua kitabında qeyd edilib. Kəfəminin “Misbah” kitabının 22-ci fəslində və “Bihar əl-ənvar” kitabının 20-ci cildində də bu duanın bir hissəsinə işarə vardır. Ümumilikdə, duanın sənədi o qədər də mötəbər sayılmır. Lakin bu duanı rica (ümid) qəsdi ilə oxumaqda savab vardır. Bəzi alimlər (Ayətullah Kəşmiri, Ayətullah Safi Gülpaygani və b.) rica qəsdi ilə bu duanı oxumağı caiz bilmişlər.