Çox soyuqdu xatirələr,
Həsrətinə bürünürəm.
Heç düşünmədiyim qədər
Yenə səni düşünürəm.

Şahidi ol bu halımın,
Nökəriyəm xəyalımın
Əl çatmayan vüsalımın,  
Arxasıyca sürünürəm.
Yenə səni düşünürəm.

Tənhalıq çox sevir məni,
Eşqin alıb əsir məni.
Xəncər kimi kəsir məni,
Parçalanıb bölünürəm.
Yenə səni düşünürəm.

Qara bəxtim boynun əyib,
Talehim ağ libas geyib,
Ürək ʺhazırlıq etʺ deyib.
Müvəqqəti döyünürəm.
Yenə səni düşünürəm.

2016

Mirşen Xeyal