Dünən "Yaşıl Teatr”da müğənni Sevda Yahyayevanın "Unut” adlı solo konserti baş tutub.
Maraqlı anlarla yadda qalan konsertdə sürprizlər yaşanıb.
Müğənninin səhnə dekorasiyasında diqqət çəkən ad və soyadının baş hərflərinin taxtadan düzəldilmiş və üzəri qaşlarla bəzədilmiş "SY” formalı fiqur idi.
Səhnəyə qızılı libasla çıxan sənətçi ilk olaraq "Heç qayıtma” mahnısını səsləndirib. Gürcüstandan gələn kişi rəqqasların müşayiəti ilə bir-birinin ardınca sevilən mahnılarını oxuyan Sevda onu dinləməyə gələnlərə təşəkkür edib.
Sonra tamaşaçılar arasında oturub, rəqqasların gecə üçün hazırladığı xüsusi şounu izləyən Sevdanı sənətçi dostları da tək qoymayıb.
Onu izləməyə gələnlər arasında müğənni Zamiq Hüseynov, Ayan Babakişiyeva, bəstəkar Hacı Nazim, Ruhi Əliyeva və başqaları yer alıb.
Gecənin özəl qonağı isə xalq artisti Aygün Kazımova olub. İstanbuldan Sevda üçün Bakıya gələn müğənni konserti başlayandan iPad ilə videoya çəkib. Daha sonra səhnəyə çıxan A.Kazımova Sevda ilə "Şəklimi çəkə-çəkə” mahnısını duet oxuyub.
Səhnə dekorasiyasını və Sevdanın performansını çox bəyənən xalq artisti xoş təəssüratlarını tamaşaçılarla bölüşüb.
Sevda konsertin sonunda "Unut” mahnısını səsləndirib.
Qeyd edək ki, təşkilatçılığını prodüser Tolikin etdiyi "Unut” adlı konsertin informasiya dəstəyi aparıcıları Afaq Gəncəli və Zaur Nəbioğlu, rejissoru Aynurə Səmədova, musiqi rəhbəri isə Hakan Erol olub.
Müğənni ayın 21-də saat 21:00-da baş tutan gecədə 21 mahnı oxuyub.