Məşhur modelyer-dizayner Şəlalə Maqsudova instagram səhifəsində şok hadisəylə üzləşib. Belə ki, xalq artisti Aygün Kazımova şəxsi instagram səhifəsində modelyerin 9 ay əvvəl İlqarə Kazımovaya tikdiyi paltarı geyinərək fotosessiya etdirib. Lakin paltarın dizayneri olaraq Şəlalə Maqsudovanın deyil, Türkiyə və Azərbaycanda yetərincə tanınan azərbaycanlı dizayner Rüfet İsmayılın adını qeyd edib. Bu isə Şəlalə Maqsudovanı özündən çıxarıb.


Hadisə ilə bağlı Ailem.az-a açıqlama verən Şəlalə Maqsudova hadisədən çox sarsıldığını dilə gətirib: “Mən Aygün Kazımovanın instagram səhifəsini izləmirəm. Sadəcə Aygün xanımın qızına 9 ay əvvəl tikdiyim paltarı şəxsi səhifəmdə paylaşmışam. Mənə dedilər ki, Aygün xanım həmin geyimdə fotosessiya edib və şəklin altında başqa dizaynerin adını qeyd edib. Və mənə ultimatum göndərirlər ki, bu paltarın şəklini öz instagram səhifəmdən silim. Niyə öz əllərimlə tikdiyim paltarı öz səhifəmdə paylaşmamalıyam? Niyə başqası mənim tikdiyim paltarı öz adına çıxmalıdır? Aygün Kazımovanın oxuduğu mahnını başqası ağzını tərpədib oxusa və desə ki, mən özüm oxumuşam, ona necə təsir edər? Bax o cür də mənə təsir edir. Haqqıma girənlərə isə haqqımı halal eləmirəm. Belə hadisələr ilk dəfə deyil başıma gəlir. Dəfələrlə ulduzlarımızdan belə haqsızlıqlar görmüşəm. Sadəcə ayıb olsun”.