● Dolmanın içliyi üçün lazım olan düyünü mütləq ilıq suda saxlayın, yumşalsın. Nişastasından ayırmaq üçün bir neçə dəfə yuyun. Beləcə içliyin sərt olmağının qarşısını almış olarsınız;
● Dolmanızın daha ləzzətli olmasını istəyirsinizsə, zeytunyağından istifadə edə bilərsiniz;  
● Dolmaların bişərkən, dağılmaması üçün üzərinə boşqab qoyun;
● Artıq qalan dolma içliyini soyuducuda saxlaya bilərsiniz;
● Dolmaların qurumaması və daha parlaq görünməsi üçün soyudarkən, qazanın qapağını azacıq aralı saxlayın;
● Yarpaq dolmasının yarpaqları qalın, damarlı və çox böyük yarpaqlı olmasın. Həmçinin, ağ üzüm yarpaqları daha məsləhətdir;
● Tutma yarpaqların duzunu çıxartmaq üçün geniş bir qabın içində suya basın və aradabir suyunu dəyişdirin;
● Kələm yarpaqlarının daha yaxşı bişməsi üçün pörtlətdikdən sonra soyuq suda saxlayın;
● Dolma bişirəcəyiniz badımcan, pomidor kimi tərəvəzlərin qabıqlarını soymayın;  
● Dolma içliyinin daha ləzzətli olmasını istəyirsinizsə, soğanını bol edin;
● İçliyə əlavə edəcəyiniz soğanı sürtgəcdən keçirməyin, bıçaqla doğrasanız dolmanız daha dadlı olacaq;
● Təzə nanə, şüyüd, cəfəri kimi göyərtilər dolmalarınıza fərqli bir dad qatar;
● Dolmaların içliyini doldurarkən, düyünün və yaxud da bulqurun bişərkən yer qalması üçün üstündə boşluq saxlayın. İçliyi çox doldurmayın;  
● Dolmalar bişərkən duzu birbaşa dolmaların üzərinə yox, suyuna əlavə edin;
● Dolmalar bişərkən, qurumasın deyə, üzərinə sərt və damarlı bir neçə yarpaq sərin;
● Kələm və yarpaq dolması bişirəcəyiniz qazanın dibinə sərt yarpaqlardan düzsəniz, qazanın dibindəki dolmalarınız daha yaxşı bişər;  
● Dolmanı qaynayana qədər yüksək odda, qaynadıqdan sonra isə vam odda bişirin;
● Bişən dolmaların üzərinə biraz zeytunyağı gəzdirsəniz, dolmalarınız həm daha ləzzətli olar, həm də daha parlaq və gözəl olar;
● Bişən dolmaları öz bişdiyi qabında soyudun.