Pillə - pillə qalxır yaşım,
Yarpaq- yarpaq enir ömür.
Torpaq- torpaq ağırlaşır,
Gah susur, gah dinir ömür.
İndi daşı əzəndə də,
Peşman olur ayaqlarım.
Daşdan yara aldığında
Daşa deyil,ürəyimə
Düşman olur ayaqlarım.
Niyə onu daş -kəsəyə,
Sürüyürsən,ay ürəyim?
Yanlış yolun daş-kəsəyin,
Öpür yorğun ayaqlarım,
Çürüyürsən ,ay ürəyim...
Ömür gedir ayaq- ayaq.
Əcəl gəlir oyaq-oyaq,
Bu get gəlin arasında,
Əriyirsən,ay ürəyim.
Ağac-ağac solur ömür,
Yağışlara küsür,ölür.
Budaq-budaq sınır ürək,
Gedən qırır,gələn gömür.
Calaq-calaq hara qədər?...

Zəhra Əkrəm