Görsəniz ağlaram tez qınamayın,
Dərdimi bilməmiş siz qınamayın,
Sevmişəm bir gözəl qız qınamayın,
Axıdıb gözümdən qəm yaşı zalım,
Buraxın dərdimlə baş - başa qalım.
Bir zaman vüqarlı dağım var idi,
Fərəhli günlərim çağım var idi,
Məhəbbət deyilən bağım var idi,
Dəymişim qalsa da töküldü kalım,
Buraxın dərdimlə baş - başa qalım.
Ruhumun qidası nəfəs qalmayıb,
Düşüb çıxmadığım qəfəs qalmayıb,
Danışıb gülməyə həvəs qalmayıb,
Zəhərdən acıdır dodaqda balım,
Buraxın dərdimlə baş - başa qalım.