Səmra evə gələndə nə qədər gizlətmək istəsə də anası onun gözlərinə baxan kimi ağladığını hiss etmişdi. Səmra heç bir söz demədən hamamda üzünü yuyub otağına keçdi, anası arxasınca içəri keçib, nələr olduğunu soruşanda o, yalnızca “tək qalmaq istəyirəm” deyib heç nə danışmaq istəmədiyini bildirdi, anası da pərt halda otaqdan çıxıb atasının iş otağına keçdi, təbii ki, atasına gördüklərini danışacaqdı. Artıq heç nəyin Səmra üçün mənası yoxuydu, o özünü çox təhqir olunmuş hiss edirdi, o valideynlərini nə qədər çox istəyirdisə onların hörmətini bu istəkdən də üstün tuturdu. Bu gün isə ona sevdiyi insan ürəyi istəyən kimi valideynləri haqqında sözlər demiş, o ki var təhqir etmişdi. Və bu bağışlanacaq sözlər deyildi. İki günü Səmra heç bilmədi necə keçirtdi, özü evdə olsa da qəlbi orda – Atabəyin yanındaydı, zəng vurub onu axtarmaqdan asan heç nə olmadığı kimi onu axtarmaqdan da mümkünsüz bir şey yoxuydu. İki gün keçsə də nə Atabəydən xəbər varıydı, nə də Səmra axtarmışdı onu. Səmra hələ də ürəyində düşünürdü ki, bəlkə axtardı, axı onun nə qədər əzab çəkdiyini, onu necə alçaldıcı vəziyyətə saldığını bilirdi Atabəy?! O, fikirli, dalğın universitetdən qayıdırdı, birdən telefonuna zəng gəldi, Nilgünün nömrəsiydi, Səmra təəccüblə: – Salam, Nilgün. – Salam, Səmra, necəsən? – deyib duruxdu. Onlar 11 il bir sinifdə oxumasına və bu illər ərzində həmişə bir-birlərinə hörmət bəsləmələrinə baxmayaraq aralarında elə bir pərdə vardı ki, Nilgün Atabəylə qohum olsa da heç vaxt bu mövzuda söhbət açmamışdılar. Səmra üçün Atabəygilin ailəsi nə qədər maraqlı olsa da, onlar haqqında məlumat toplamaq istəsə də heç vaxt ona bir kəlmə bu haqda söz deməmişdi, daxilən onun özünün bu haqda danışmasını arzulasa da belə bir hal baş verməmişdi. – Çox sağ ol, Nilgün, xeyir ola? Mən əslində Atabəyə görə zəng vurmuşdum. Ən əvvəl deyim ki, inan onun bu zəngdən xəbəri yoxdu. Dünən biz mamayla onlara getmişdik, Atabəyin qanı çox qaraydı. Sara xala dedi ki, nə yemək yeyir, nə söz eşidir. – Niyə ki? – Bilmirəm, elə mən də ona görə zəng vurmuşam, anası çox narahatdı. Sara xala deyir bu belə əsgərlikdə neyləyəcək, aranızda nə olubsa o, çox ürəyinə salır, – birdən Səmra “yoxsa elə bilirsiz biz narahatlıq-filan nədir bilmirik” demək istəsə də, tamam başqa sual verdi: – Bilmirsənsə bil, Nilgün, biz danışmırıq. Buna görə də onun neylədiyini bilmək istəmirəm, incimə. – Yox, mən incimirəm, əslində sən məni bağışla ki, narahat etdim, – deyib bir az susduqdan sonra əlavə etdi: – Atabəy bu gün axşam 5-ə qədər burdadır, sonra gedir... Səmra saat 5-ə kimi hər dəqiqəni, hər saniyəni ürək döyüntüsüylə keçirdi. Atabəyin əzab çəkməsinə, bir sözlə, onunla eyni vəziyyətdə olmasına rəğmən Atabəyə acıqlıydı, o, Səmranın gözünün içinə baxa-baxa valideynlərini təhqir etmişdi. Səmranın göz yaşlarına əhəmiyyət belə vermədən, çəkinmədən ağzına gələni söyləyən adam bu gün əsgər gedir deyə necə bağışlayardı, ürəyində “əlbəttə, bağışlayacam, amma qoy hələ belə getsin, başa düşsün məni necə incitdiyini, səhvini anlayıb üzr istəyəndə bağışlayacam” deyirdi. Atabəydən əbədi ayrılığı o, heç vaxt özünə yaxın qoymurdu. Atabəysiz həyat mümkün deyildi, Atabəy onun arzusu, xəyalıydı... Səmra dərs bəhanəsilə otaqdan çıxmır, bu anların ağırlığını yaşayırdı, nəhayət, saat 5 tamamdı, “getdi” kəlməsini ürəyindən keçirib gözləri doldu Səmranın, elə bu an Səmranın telefonuna zəng gəldi. Atabəy idi. Zəng bir dəfə uzun çaldı, cavab vermədi Səmra. O bilirdi ki, Atabəy ancaq sağollaşmaq üçün zəng edir, Səmranın qüruru yol vermirdi ki, heç nə olmamış kimi danışıb ona yaxşı yol desin. Telefonu açıb o gün baş verənlər haqqında danışıb valideynlərini təhqir etməyi ona xatırlatmaqsa bu dəqiqə, onun getdiyi an mövzu ola bilməzdi. O, telefona cavab verməməklə bilirdi ki, Atabəyi məhv edib, dəfələrlə “sənə özümdən çox inanıram” deyən Atabəyin güvənini sarsıdıb. Həyatının ən vacib anında onu tək qoymaqla aralarında qırılmış bağlar bəlkə də heç bir vəchlə bir-birinə yenidən bağlanmayacaqdı. Ancaq Atabəyin ondan incik getməyinin ağırlığı bir tərəfə, Səmranın özünün də Atabəyə ehtiyacı varıydı, onun yanında olub, onu hər dəqiqə, hər saniyə gözləyəcəyini deməliydi axı... indisə artıq olan olmuşdu, “həyatım” dediyi insandan gələn zəngə cavab verməmişdi o. Bu dəqiqə zəng etmək olardı əslində, bu onun ürəyinin ən böyük arzusu, qürurunun isə yox dediyi istək idi. Birdən-birə o, elə həsrət duydu ki, təkcə göz yaşlarına gücü çatdı... ağladı, bütün gecəni ağladı, ağlayaraq dönə-dönə “Niyə belə etdin, Atabəy, axı mənim qürurumu niyə bu qədər qırdın, niyə məni seçim qarşısında qoydun? Axı bilirdin... bilirdin ki, mən səni sevirəm, bilirdin ki, bu həyatda mənim səndən və valideynlərimdən başqa heç kimim yoxdu” dedi. Atabəy gedəndən sonra Səmra üçün günlər çox ağır keçirdi, universitetdə özünü nə qədər dərslərə versə də, yenə uzun gecələr varıydı ki, Səmra bu gecələri az qala səhərə qədər Atabəyi düşünə-düşünə, göz yaşları içərisində keçirirdi. Gözü telefonunda qalmışdı, bəlkə zəng edər deyə... dərsdən evə gələn kimi hər gün ev telefonunu yoxlayır, gələn zənglərə baxırdı ki, bəlkə Atabəy zəng vurmuş ola, amma heç bir səs-səmir yoxuydu. Səmra ruhi pərişanlığını evdə nə qədər valideynlərindən gizləməyə çalışsa da valideynlərinin gözündən heç nə yayınmırdı, baş vermiş hadisə haqqında bir kəlmə belə söhbət açmırdılar, bacardıqları qədər Səmraya diqqət göstərib qayğıyla yanaşırdılar. Valideynləri bir-birlərinə “zamanla keçəcək” deyib özlərini inandırsalar da heç nə keçmirdi, əksinə, günlər, aylar onların əleyhinə işləyirdi, bircə qızları gözləri önündə əriyib gedirdi. Onlar son vaxtlar Səmranın üzünün güldüyünü artıq xatırlamaz olmuşdular. 6 ay belə vəziyyət evdə davam etdi, Səmra valideynləri əzab çəkməsin deyə zorla yanlarında özünü ələ alır, gecələr ağlamaqdan şişmiş gözlərini valideynlərindən gizləyirdi, istəmirdi ki, anasıgil ağladığını bilsin, kədərini məharətlə gizlətməsinə baxmayaraq valideynləri hər şeydən xəbərdar idi. Valideynləri etdiklərinin yalnız indi nə qədər yanlış addım olduğunu düşünürdü. Əvvəldən Nailənin gözü tutmamışdı nə Atabəyi, nə də onun ailəsini. İlk dəfə məzuniyyət günündə görmüşdü bu ailəni, baxmayaraq ki, bu ailə kasıblığı ilə Nailənin öz çıxdığı evi xatırladırdı, amma bu gün Nailə üçün qorxunc mənzərəydi belə bir ailə ilə qohumluq, Atabəyin atasının kobud görkəmi, anasının səliqəli olsa da nimdaş əyin-başı ilk gördüyü gündən qıcıq yaratmışdı onlara qarşı özündə. Bu üst-başlarından ehtiyac yağan insanların onun qızı ilə nə işləri ola bilərdi axı? Əslində Atabəyin zahiri görkəmi, özünü aparması Nailənin xoşuna da gəlirdi. Amma bu məziyyətlər nə qədər xoş olsa da, o, sözsüz ki, Səmranın tayı deyildi. Səmra Atabəylə hər görüşəndə anasına xəbər verirdi, o, Səmranın görüşlərinə razılıq versə də ürəyində Atabəyə o ki var qəzəblənirdi. Atabəyin həddini bilməzliyi onu səbirdən çıxarırdı, amma Səmranın xətrinə dəymək istəmədiyindən təmkinli aparırdı özünü, həm də nə qədər ki qadağa zonasını keçməmişdilər, onlarla işi yox idi. Ürəyindən dəfələrlə “nə deyim sənə, Səmra, bu qədər insanın içində gərək bu oğlanımı seçəydin” keçsə də qızına çox söz deyə bilmirdi. Əvvəllər qızının bu oğlanla münasibətinə bir elə ciddi baxmırdı və öz-özünə “zamanla hərə öz yoluna gedəcək” düşündükcə, onlar irəli gedirdi. Onlar irəli getdikcə artıq Nailə uyğun məqam gözləyirdi ki, hansısa addımı atsın. Ən axırda Atabəyin atasının ölüm günü, artıq Nailənin səbir kasası doldu. Gecə vaxtı qızının özbaşına oğlanın evinə getməsi artıq ağ etmək idi, səbəbi nə olur olsun, bu, yolverilməzdi onun üçün. Onlara ciddi dərs vermək vaxtıdır deyib fəaliyyətə keçdi. Əlbəttə, o öz planını ərinə söyləyəndə əvvəlcə razı olmamışdı, ancaq sonra onu yola gətirə bilmişdi. Atabəyin atasının, qardaşının narkotik üzündən həbs olunmasını bilmək elə bəs oldu ki, o, arvadının planı ilə razılaşsın. Onlar yas yerinə gedəcək, yas yerində düzgün olmasa da, Atabəyi səbirdən çıxaran, qürurunu incidən bir-iki kəlmə söz deyiləcək, Atabəy də istənilən gənc kimi özünə nəzarəti itirəcək, onlara da, Səmraya da ağzına gələni deyib, əsas adamın, Səmranın qarşısında günahkar olacaq. Nailə bilirdi bu yanlış addımdı, amma bu addıma görə özünü yox, qızını və bu həddini bilməyən oğlanı qınayırdı. Nailə düşünürdü ki, indi o bu addımı atmasa gələcəkdə qızı özü onu qınayacaqdı ki, bəs siz hara baxırdız? Eyni hadisə təkrarlanırdı, övladı qədər sevdiyi bacısı Əminənin seçimi ürəyincə olmasa da, susmuşdu, qarışmamışdı. Sonralar Əminə bədbəxt anlarının birində üstüörtülü olsa da bacısına anlatmışdı ki, mən kor idim, bəs siz niyə imkan verdiz... Bu üzdən də Nailə hansı yolla olur olsun, qızını bu oğlandan ayıracaq, bacısı Əminənin taleyinin təkrarlanmasına yol verməyəcəkdi. Hər şey düşünüldüyü kimi keçdi, işlər planlaşdırıldığından da uğurlu baş tutdu. İlk günlər Nailə öz qələbəsini qeyd etsə də, sonradan Səmranın bitib-tükənməyən kədəri, yuxusuz gecələri onları boğmağa başladı. Düz 6 ay idi ki, evdə cəhənnəmə bənzər ab-hava var idi. Səmranın halı pərişan idi... Tahir qızının əzabına dözə bilmir, yol verdiyi böyük səhvə görə özünü qınayırdı. Nailə isə ərinin və qızının ətrafında günahkar-günahkar hərlənirdi. Günahkarlıq hissi hər insanda olduğu kimi onu da xeyirxahlaşdırmışdı, əvvəlki zabitəli, qətiyyətli Nailə yox idi artıq. Bilmirdi ki, ərinin və qızının üzünü necə güldürsün. Onu heç kim qınamırdı əslində, heç kim üzünə vurmurdu ki, niyə belə etdin, ya da sən düzgün eləmədin. Amma onu heç kim qınamasa da Nailə öz günahını tam anlamıyla dərk edirdi, evdəki ağır vəziyyətin tək səbəbkarı özüydü. Və belə ağır günlərin birində ər-arvad razılığa gəlir ki, bu çətin vəziyyəti aradan qaldırmağın yeganə yolu Atabəyə hər şeyi danışmaqdı. Yalnız ondan sonra Atabəy Səmranı axtarar, əlbəttə ki, sonda barışıq olar. Uzun müzakirədən sonra, nəhayət, evdə qərar qəbul olundu ki, Tahir özü şəxsən Atabəylə danışsın, gərəkirsə üzr belə istənilsin, amma işlər yoluna qoyulsun. Tahir öyrəndi ki, Atabəy Şəmkirdə hərbi xidmətdədi və vaxt itirmədən yola düşdü. Tahir yola düşər-düşməz Nailə qurduğu oyunu nə qədər çətin də olsa qızına etiraf etdi. Səmra isə həqiqəti biləndə həmişə olduğu kimi gücü bircə göz yaşlarına çatdı, əlbəttə, o indən sonra Atabəyi axtara bilməzdi, onu axtarası üzü yox idi. Səmra düşünürdü, axtarıb ona nə deyə bilərəm axı? Mən səni indi tanıdım ki, sən dürüst biri imişsən? Ya deyəcəm ki, mənim valideynlərim sənin başına oyun açıbmış? O valideynlərinə nə qədər acıqlı olsa da onlar onun valideynləri idi, onların əməlini dilinə almaq Səmra üçün xəcalət idi. Və düşündükcə əmin olurdu ki, istənilən halda o Atabəyi axtara bilməyəcəkdi.