Ata, belə danışma, – deyib kövrəlsə də o, sözünə davam etdi: – Mən bu söhbəti sənlə çoxdan etməliydim, axır ki, bunu etməyə özümdə cəsarət, güc tapdım. Bu səbəbdən dinlə məni, sənin mənə və anana hörmətin, etimadın itib, bunu mən çox gözəl anlayıram və buna sonsuz dərəcədə təəssüf edirəm. Bizim aramızda bizi bir-birimizə bağlayan təbii sevgi qalıb, dərin doğmalıq bağından doğan sevgi, valideyn sevgisi, bu elə bir sevgidir ki, buna qarşı qoya bilmirsən, buna rəğmən sevirsən. Hörmət və sevgi bir-birindən fərqli şeylərdi, çox vaxt biri digərini istisna edir. Bunların ikisinin bir arada olması nadir olan şeydi, lakin mümkünsüz deyil... amma hər halda sevgisiz yaşamaq olsa da hörmətsiz, sayğısız yaşamaq yaşamaq deyil, hörmət hissini itirmiş ailə qırıq-qırıq, parça-parça olub dağılır. Bu zaman sevgi nə qədər ilahiləşmiş olsa belə kömək edə bilmir. Ən azından mən belə düşünürəm. Sən onu sevirdin, – o, Atabəyin adını bilsə də çəkmirdi, – ona olan sevgin nə qədər böyük olsa da, bizə olan etimadından, bizim sözümüzün gerçək olub-olmaması sənin üçün müzakirə mövzusu belə olmadı, əslində dönə-dönə yoxlamaq olardı, bu söhbətin gerçək olub-olmadığını aydınlaşdırmaq, dərininə getmək olardı, amma sən etmədin. Halbuki bütün bunları düşünüb edəcək qədər sənin ağıllı olduğunu məndən yaxşı heç kim bilə bilməzdi. Sən anana və mənə olan etimadından bizi yanlış tərəfdə görmək istəmədin, insan görmək istədiyini görər, eşitmək istədiyini eşidər, sən də əzab çəkmək bahasına olsa belə bizi doğru yerdə görmək istədin, bizim yanımızda oldun. Həqiqəti biləndə isə bircə dəfə də olsun üzümüzə vurmadın, üsyan etmədin, bu şərə xeyirlə cavab vermək kimi bir şey idi. Bu iki itkinin haqq-hesabını tələb etmədin; səni boya-başa çatdıran valideyn və həyatında dəyər verib, sevdiyin insanın itkisinin əzabını yalnız başına çəkdin. Və istəyirəm biləsən ki, sən buna layiq deyilsən, sən həqiqətən yaxşı qızsan, Səmra! Sən misilsizsən, sənin həddən artıq böyük ürəyin var. – Son sözlərini deyəndə artıq onun səsi titrəyirdi. Səmra atasını ilk dəfəydi belə çarəsiz görürdü, həmişə onun gözündə dəmir iradəli bir insan olmuşdu halbuki. – Bu illər ərzində sənin ruhi pərişanlığının, keçib getməyən kədərinin səbəbi heç kim yox, mən özüm idim. Ananı günahlandıra bilmərəm, o qadındı, qadınlar ərlərinə təsir edə bilirlər, amma son sözü onsuz da həmişə kişilər deyir, hər dəfə sənin solğun, cansız üzünə baxanda səndən əsirgədiyim xoşbəxt anlara görə, içimdə ilişib-qalmış günah hissi gün-gündən böyüyürdü. – Artıq ikisinin də gözləri yaşarmışdı, o, bir az susduqdan sonra yenə danışdı: – Amma həyat ədalətsizdi, valideynin səhvinin cəzasını övlada çəkdirməməliydi, – deyib Səmraya mehriban nəzərlərlə baxmağa davam etdi, – hər şeyin bir həddi var, artıq xoşbəxt olmalısan. Və sən xoşbəxt olmaq üçün lazımi qədər əzab çəkmisən. Həyat bizə xoşbəxt olmağa o zaman izin verir ki, artıq səndən alacağını alıb və artıq səndən alınan alınıb, indi gəncliyinin xoşbəxtliyə ehtiyacı olduğunu düşün, insan yalnız bir dəfə gənc olur. Heç nəyi, heç kimi düşünmə, yalnız xoşbəxt olmağa çalış. Xoşbəxtlik səni gözləyir. – Səmra onun ürəyindəki ağır yükü hiss edirdi, və bu yük təkcə onu yox, Səmranı da atasıyla birlikdə əzirdi. Söhbət əsnasında Səmra bir neçə dəfə “ata” desə də atası danışırdı. Ata-bala arasında bu tərz söhbətlər nadir hallarda, bəlkə də ömürdə bir yol olur. Bir-birlərinə olan kövrək baxışlarıyla hər ikisi bunu anlamaqdaydı. – Yox, bu haqda gərək çoxdan danışaydım sənlə, – deyib qızına gülümsündü, – mən həmişə yaxşı ata olmağa çalışdım, düzdü, üzdə bunu elə yaxşı göstərə bilmirdim, amma mən çalışırdım ki, yaxşı ata olum, ümumiyyətlə, mən öz sevgisini başqalarına asanlıqla bəxş edən insanlardan olmamışam heç vaxt. Bunu ən yaxşı anan bilib. Qapanıq adam olduğumdan ürəyimdən keçsə də mənə həyatda ən əziz olan insanla – öz qızımla belə səmimi ola bilmədim. Amma bu gün sənlə bu söhbəti edəndə düşünürəm ki, bu elə də çətin deyilmiş və sonda onu anladım ki, bəzi həyati səhvlərin üzrü olmur, bu üzdən də bağışla demirəm... – O bu sözlərlə nitqini başa vurduğunu bildirmək üçünmü, yoxsa gözünün yaşını qızının görməməsi üçünmü üzünü yana çevirdi. Səmra onun əzab dolu üzünü özünə tərəf dönməsini gözləmədən onun boynunu qucaqlayaraq öpüb göz yaşları içində otaqdan çıxdı. Atasıyla söhbət ona çox dərin iz buraxmışdı. Uşaqlığından bəri onunla heç vaxt bu qədər yaxın olmamışdı, o, duyğularını atası qədər saxlaya bilən ikinci adam tanımırdı. Bu qədər məsafəli olmalarının səbəbi bəlkə də anası olmuşdu, atasının qızı haqqında düşündüklərini, qızına çatdırılası hər hansı sözü vasitəçi kimi ancaq özü həll etmişdi. Atası demək olar ki, qızına verəcək sevgini də arvadıyla göndərmişdi Səmraya. Ailənin bu ağır günlərində Sabirgil onlara ən yaxın qohum kimi dəstək oldular. Tahir xəstə olsa belə onların bu canfəşanlığını görür, hələ də Səmrada gözləri olduğunu dərk edirdi, bu üzdən ikisi də yatağında uzandığı vaxt arvadına: – Nailə, bu Sabirgili neyləyək? Vallah adam lap utanır, ər-arvadın etdiyi bir tərəfə, Rəşad kimi oğlanı itirmək isə mənə çox ağır gəlir. Bunu eşidəndə elə bil Nailənin dərdi açıldı: – Gör mən nə çəkirəm indi. Solmazın üzünə baxa bilmirəm, deyirəm indi bizim haqqımızda fikirləşir ki, özlərini naza çəkirlər; nə hə deyirlər nə yox. Bir də mən xəstəxanada fikir verdim ki, Rəşad özü də Səmraya qarşı nələrsə hiss edir. Rəşad hiss etdirmək istəməsə də mənim gözümdən elə şeylər qaçmır, bir əli işdə olsa da bir gözü onun üzərindəydi həmişə, bizimki də buz kimi fırlanırdı boş-boş, biz neyləyəcəyik bu qızla? – Neyləyəcəyik, get qızla danış, razı deyilsə sözümüzü deyək, ayıbdı, adamları bu qədər gözlətmək düzgün deyil, qoy getsinlər oğullarını evləndirsinlər. Bunu eşidəndə Nailə: – Bəs bizimkinin axırı nə olacaq? – Nə olacaq, öz həyatına davam edəcək. Qolunu burub verəsi deyilik ki, 25 yaşında qızdı, – o, daha qəti bir səslə əlavə etdi: – Bax sənə yenə deyirəm, artıq söhbət etmə, qızın son dəfə fikrini öyrən, yox deyirsə yox, başqa söhbət etmə. Ərinin qəti şəkildə tapşırığına əməl etməkdən başqa əlindən heç nə gəlməyən Nailə qızına necə təsir edəcəyini düşünə-düşünə yuxuya getdi. Səmra atasının xəstəliyindən sonra çox üzgün, yorğun bir haldaydı, atasının başına gələnlərdə özünü də günahkar sayır, bəzi şeyləri özünə bağışlamırdı, məsələn, o düşünürdü ki, hər şeyə rəğmən o “yaxşı qız” olsaydı valideynlərini xoşbəxt edə bilsəydi, bəlkə atası da belə xəstələnməzdi. İnsanın həyatı gərək əvvəldən səhv olmasın, doğru başlanğıclar insanı bir ömür izləyir, və sonda doğru yerdə qərarlaşmasına gətirib çıxarır. “Bəlkə də vaxtında mən sevgimə inansaydım, arxasında dursaydım, öz sevgimdən qorxmasaydım, zamanla valideynlərim də məni bağışlayar, bir-birimizdən indiki kimi əbədi qırılmazdıq... Bəs mən neylədim? Mən qorxaq kimi özümü həyatın axarına buraxdım, həyat ürəyi istədiyi kimi bataqlıqlarında boğdu ruhumu, təkrar-təkrar yenidən diriltdi. Qorxaqların da axırı beləcə olur, nə onu bağışlayırlar, nə də o özünü bağışlayır. Həyatının hər səhifəsi keşkələrlə başlayıb keşkələrlə bitir”. Anası ondan hə, ya da yox qərarını öyrənmək istəyəndə əslində çox ümidsiz gəlmişdi, lakin Səmranın qərarlı bir şəkildə ona “mənə fikirləşməyə bir gün vaxt ver” deməsi onu əməllicə çaşdırmışdı. Səmra bu “bir gündə” Rəşadla danışmaq istəmişdi, gecədən Rəşada zəng vurub “imkan olsa işdən sonra görüşək” deyəndə Rəşadın səsindəki sevinci hiss etməmək mümkün deyildi. Rəşadla danışıb yatağına uzanan Səmra sabahkı görüşü düşünməyə başladı. O qərarlıydı, Rəşada hər şeyi anladacaqdı, hər şeyi, və hər şey də onun reaksiyasından asılı olacaqdı. Rəşad nə qədər müasir, nə qədər nikbin əhval-ruhiyyəli biri olsa da Azərbaycan kişisi idi və evləndiyi qız haqqında hər şeyi bilmək onun ən təbii haqqı idi, bunu bilməyinsə ən yaxşı yolu Səmranın özündən eşitmək idi. Danışdıqları kimi Rəşad saat 5-də onu gözləyirdi. Səmra ona yaxınlaşanda Rəşadın üzü həmişə olduğu kimi gülərüz, mehriban idi. Amma bu dəfə baxışlarında narahatçılıq varıydı. Salamlaşıb maşına oturduqdan sonra Rəşadın ilk sözü: –Tanıdığım yaxşı restoran var, bəlkə ora gedək? – Gedək, mənim üçün fərqi yoxdu, – deyib razılıq bildirdi Səmra. Yolboyu onlar Tahirin xəstəliyindən, evdə darıxmasından danışdılar, sonra Rəşad atasının da dincəlmədən hər gün işləmək həvəsindən söhbət açdı, bir sözlə, özlərindən başqa hər şeydən danışdılar. Restoran dənizkənarı açıq havada, gözəl mənzərəli yerdəydi. Səmra ilk dəfəydi görürdü buranı, ümumiyyətə, atasıgil belə yerlərə gələndə həmişə boyun qaçırmış, min bəhanə ilə gəlməmişdi. Gəzmək, adam çox olan ictimai yerlərə getməkdən yeni bir kitab alıb ləzzətlə oxumaq onun üçün daha üstün olmuşdu həmişə. Onları görən kimi ofisiantın Rəşada yaxınlaşıb xüsusi ayrılmış yeri göstərəndə Səmra hiss etdi ki, Rəşad buranı arayıb-axtarıb, ən yaxşı yerlərdən biri olduğunu əvvəlcədən öyrənib, sonra gətirib Səmranı. Yeməklər sifariş olduqdan sonra Səmra söhbətə başlamaq üçün vaxtın gəldiyini düşünərək ciddiləşib: – Sənə deyiləsi sözüm var, – dedikdə: Rəşad gülümsünüb: – Bu sözü neçə aydı gözləyirəm, buyur, – deyib gözlərini maraqla Səmraya dikdi. O, heç nə gizlətmədən ona beş il əvvəl həyatında çox sevdiyi birinin olduğunu, ailəsinin bu sevginin əleyhinə olduğunu, sonradan hər şeyi birlikdə məhv etdiklərini, sevdiyi şəxsin onun qərarsızlığına görə onu bağışlamadığını, sonrakı peşmançılığını, əzablarını həyəcanla anlatdı Rəşada. Rəşad isə hansısa dəhşətli bir hadisəni eşidəcəkmiş kimi nəfəs almadan onu dinləyirdi. Birdən Səmra dayandı, elə bil ürəyini boşaldıb qurtarmışdı. – Bəs əsgərlikdən gələndən sonra səni axtardı? – deyə Rəşad sual dolu nəzərlərlə Səmraya baxdı. – Yox, axtarmadı, heç xəbərim olmadı gəldiyindən də, – o gözləri dolmuş halda, – bağışlamadı, birdəfəlik getdi, – deyə cavab verdi. – Sən dediyin qədər sevsəydi bağışlayardı, – deyən Rəşada, Səmra adi baxışla baxıb: – Bəlkə də... – dedi və ürəyindən keçəni ona demədi ki, çox sevənlər bağışlamazlar, ayrılarlar. Demədi ki, sıradan hamı kimi sevənlər bağışlayarlar, dərin sevənlər zərrə şübhə etsələr bağışlamazlar... gedərlər Atabəy kimi... Səmra danışdıqlarını nə qədər həyəcanlı, nə qədər ağır hisslərlə anlatsa da bu Rəşada elə də əzablı eşq hekayəsi kimi görünmədi. Səmra təkidlə “ola bilməz” deyəndə nəsə dəhşətli bir hadisə gözləmişdi əslində, ürəyində “ola bilər ki, kimsə aldadıb, nəsə pis oyun açıb başına, onun da oğlanlara güvəni itib, ya da utanır başına gələnlərə görə” – düşündü. Ancaq Səmranın anlatdıqlarından bu tipik varlı qızla kasıb oğlanın hekayəsi idi, və bütün hekayələrdəki kimi ailə işə qarışmış, bəlkə də haqlı olaraq doğru yolu qızlarına göstərmişdi, əlbəttə ki, Səmra da çox həssas olduğundan uzun müddət ürəyinə salmış, əzab çəkmişdi. Oğlansa, görünür, qız düşündüyü qədər elə də ciddi yanaşmamış Səmraya, valideynlərini tanıdıqdan sonra ona hər hansı problem yaradacaqlarından bəlkə də qorxmuş, uzaq durmaqda görmüşdü məsələnin həllini. – Bunları ona görə sənə danışıram ki, mən qorxuram səni xoşbəxt etməyəm, səhv etmirəmsə Romen Rollanın sözüdü: “Başqalarına işıq saçmaq üçün özündə günəş olmalıdır”. Mənsə bu günəşi özümdə hiss etmirəm. – Demə ki, başa düşmürəm, – deyərək Rəşad onun sözünü kəsdi, – amma məncə, sən çox ürəyinə salıbsan, bu hər insanın başına gəlir, adamlar bir neçə dəfə sevirlər, alınmır, yenidən sevib xoşbəxt ola bilirlər, – sonra gülümsünüb, – bu təcrübələrdən də onlara müdriklik qalır, – deyə əlavə etdi. Səmra ürəyindən “mən bir dəfə sevdim, o mənim ruhumdakı günəşi apardı, təbəssümümü, sevincimi, həyat eşqimi apardı, görəsən, ikinci dəfə ayrılıq yaşayanların aparılmağa nəyisə qalırmı” – sualını keçirsə də tamam başqa söz soruşdu: – Sən neçə dəfə sevibsən?.. Yox... sualı düz qoymadım, – deyib, – yaxşı, sən heç sevibsənmi? – Rəşad bir az düşünüb: – Çox sevmişəm, çox, – deyə zarafatyana bir cavab verdi, sonra ciddiləşib, – mən dərd çəkməyi sevən adam deyiləm, xoşuma gələn qızlar olsa da universitet illərində ciddi münasibət yaşamışam, birinci ukraynalı qız olub, onunla bir ilə yaxın görüşdük, ayrılandan sonra da türk qızla görüşürdüm, bura gəlməmişdən bir neçə ay əvvəl ayrılmağa qərar verdik.